… eta sariaren irabazlea da…
Bakarkako bertsoaldirik onena. Puntu-erantzunik borobilena. Bideak ongien ireki dituen bertsolaria. Gai-jartzaileak ezarritako paperei egiantzekotasun handiena eman diena. Ironia modurik finenean erabili duena. Bertso-jarririk onenak idatzi dituena. Gaiarekiko erregistroa egokien erabili duena. Pertsonaiekiko enpatia handiena adierazi duena. Bertsokideari ondoen erantzun diona. Ezkutuko ahots gehien atera dituena. Doinu bariazio handiena erabili duena. Bertsoak errimarik aberatsenez josi dituena. Egiarik mingarrienak kantatu dituena.
Haurrentzako antzezlanik onena. Ofiziotako saiorik beteena. Ondoen kantatzen duen bertsolaria. Ideiarik ausartenak kantatu dituena. Entzuleak gehien hunkitu dituena. Bertsolaririk makarrena. Bertso-afarietan ongien moldatzen dena. Istorioak borobilen eraiki dituena. Kanta baterako hitzik onenak idatzi dituena. Euskararik aberatsena darabilena. Barre-algara gehien eragin dituena. Doinu berri gehien plazaratu dituena. Mundu-ikuskera aberatsena azaldu duena. Irribarre gehien sorrarazi dituena. Xamurtasun handienaz kantatu duena. Memorian atzendutako gaiak azalarazi dituena. Entzulea pentsakor uzten duen bertsolaria.
Sari hauek eta beste hainbeste, entzuleen gustu eta baloreak adina, bana genitzakeen 2017ko abenduan, urte osoko −nahi bada lau urtetako− bertso-ibilbidea kontuan hartuta. Sariak ahalik eta gehien xehetuta ere, ez ginateke beti ados jarriko saridunen zerrenda osatzean.
