BTN22 –
Sintonia.
Atea zabalik aurrean eta bidetxoa jende artean.
Txalo zaparrada. Ilusioa. Miresmena. Eskertza. Oraindik egin ez dugun zerbaitekiko. Egin ahalko dugun ez dakigun zerbaitekiko. Kezka.
Espektatiben aurrean hazten diren mamuak. Zozketak erabakitako ordenan zure aulkian zu iritsi aurretik eseri direnak. Eta zu eurengana, eurengandik ihesi. Euren magalean eserita.
Protokolo testu bat eta bertsokideen izenak (noizko protokolo bat zure izena esan eta hurrengoa entzuten den tarte horretan zer egin jakiteko?). Txalo zaparrada. Ilusioa. Miresmena. Eskertza. Oraindik egin ez dugun zerbaitekiko. Egin ahalko dugun ez dakigun zerbaitekiko.
Ariketaka, dagokion doinu posiblearen marmar barneratua. Kidea entzun. Jarri duten temako gaian gustatu zaizun posiziotik pentsatu lehen bukaerak (ez tokatuko litzaizukeenetik). Aulkira datorrenari keinu. Altxa, gai jartzaileari begiratu, kideari begiratu, keinu.
4 bider, bulkean; roska askatzen edo lotzen, segun.
Ganbara. Talde-balorazioa. Ondo irten dena ospatu, gaizki irtendakoei buelta eman. Baten amorrua goxatu, bestearen kontzentratzeko espazioa zaindu. Zergatik estutzen dira hainbeste txikikeria horregatik sekulako saioa egin badute? Zergatik ezin ote dute euren saioa nire belarriekin entzun? Hain kolpe ona jo du hemen, hain ondo kokatu da posizio zail hartan, hain ondo itxi du ofizio hura … Ispilu bat. Akaso nik ere nire burua euren begiradarekin epaitzen ikasi behar nuke … Kontu horiek gero. Oraindik eutsi.
Ekarri doinua.
Begiratu mahian barreiatutako jan-edanak. Jango zenituzkeen gozokien zerrenda egin (zozketak agindutako ordenan) bakar bat ere ez ukitzeko. Tripa-zorriei jaten eman.
Ekarri doinua. Sartu saiora. Eutsi tentsioari.
Bi minutu. Goazen…
Eta tarteka, noiz edo noiz, akaso, egunak/aukerak/buruak/ utziz gero, bertsotan egin.
