Ameriketara bidaia –
Doinua: Nigarra begian
Martxoa zen bi mila
ta hogeita bosta
Amerika aldera
egin dugu ospa
Abioiko bidea
ez zen gutxi kosta
Eguerdirako heldu
ginen ozta-ozta
Ez genekien hango
izen-abizenik
ez genekien bertan
zen guztia zenik
heldu eta euskaraz
ez nuen uste nik
Etxetik horren gertu
egongo ginenik
San Frantziskon zubira
(eta ez alferrik)
eraman nahi gintuzten
hainbat lagun berrik
Gero euskal etxera
han ez zen okerrik
Maiz ez da ezagutzen
hain leku ederrik
Gero bertso saioa
bertan larunbatez
denok hartu genuen
halako poz batez
kantuz aritu ginen
hitz bakoitza maitez
ospatzetik gehiago
baitzeukan izatez
Bertsoak inglesera
itzultzea xede
euskaraz ez zekien
harentzat mesede
Baina seguru egin
genuela geure
Itzultzea merezi
ez zuenik ere
Igandean Chinora
ahal zen bezala
han bigarren saioa
bete-bete sala
aprobetxatu behar
baikeguen hala
Motorrak berotuta
generamatzala
Hau bukatu ostean
nahi duzu jakin non?
pozik pasa genuen
astetxo bat Chinon
Etxe baten beroak
nola ez egin on?
Halako maitasunik
ez zegoen inon!
Lagunarte ederrak
preziorik ez du
Iluntze ederrean
zeru gaina belztu
Bertso zaharrak oroitu
berriak abestu
Holakorik ez nuen
sekula amestu
Zenbat mahai inguru
gau ta egunsenti
kabi goxoan hotzik
ez liteke senti
Zaila da inon hartzen
han baino hobeki
Oroituko ditugu
egun hauek beti
Euskaldun izan eta
irauteko sena
da diaspora bizi
mantentzen duena
baina nola aldatu
ohi den sentipena
joanean poza ta
itzuleran pena
Hauxe izan da dena
kontu ta istori
honi jarri nahi nion
bertso bat edo bi
Segi lanean gogor
beti bezain ongi
Ea ez den eteten
inoiz kate hori
