2021 –
Doinua: Garia saltzen nengoelarik II
I.
Urtarrilean urte berriko
ilusio ta motibo
iraun zutenak Sarasuaren
kartzelak baino gutxigo.
II.
Otsailean inauteriek
egin zuten ez-bisita
aurtengo hontan denok atera
ginen maskara jantzita.
III.
Udaberria dator martxoan
aurtengoa gogoratu,
beste urtetan bezainbesteko
lorerik etzen loratu.
IV.
Apirilean hasi berri zen
amaieraren hasera
behar baino poz gehiagorekin
itzuli ginen klasera
V.
Maiatzan kendu egin ziguten
larrialdi egoera
mundu berri bat hasten zen baina:
lehengo kaka berbera.
VI.
San Juan bezpera ekain aldera
markatzen du eguzkiak
aurtengo suak ez ditu erre
espiritu txar guztiak.
VII.
Uztailean, gora San Fermin!
ohiturak horixe baitu
baina bigarren urtez zezenak
harrapatu egin gaitu.
VIII.
Herriko jai ta ospakizunen
hilabete da abuztu
aurten tabernak ez dira bete
ta kartera ez da hustu.
IX.
Irailean kurtso berri bat
hastera zijoala ta
liburu eta motxilak hartu,
arnasa hartzea falta.
X.
Urrian berriz egin genuen
ustez pixka bat hobera
argi printza bat sartu orduko
mediku denak kalera.
XI.
Ta azaroan Nafarroako
txapelketaren aparra
hori izan da urte txar honek
izan duen on bakarra.
XII.
Abendurako ‘mundu guztiak’
txertoa hartu du jada
ez dakit nola gauden horrela
horren ona baldin bada.
MMXXII.
Urte berri on guztioi, ea
egiten zaigun arina
baina ez dakit ez den izango
aurrekoaren berdina!
