[PERLAK] Perbertso erronda
Perbertso erronda –
Badaude guztion memorien historiara pasatu diren bertsoaldiak. Neuk ere goitik behera dakizkit errimatzen ere ez nekienean buruz ikasitako batzuk. Gaur egun ideologikoki sinatuko ez nituzkeen arren, bertsora hurbildu ninduten beste batzuk ere bai. Kariñoa diet.
Baina gaur, bertsoa ulertzeko eta bizitzeko nire modutik hurbilago dagoen perla bat ekarriko dut. Batzuentzat, agian, ez da bertsoa ere izango. Kantu batzuen moldaketa eginda sortutako agurra da. Ander Ucelay bertsolari artzentalestarrak bota zuen 2022ko Bertso Errondako finalean.
Perbertso Erronda izan zen urte horretako izenburua, eta publiko guztia jarri zuen Anderrek aldean zeraman boaren koloreko, barrez lehertzeraino. Lehiaketa itxurako formatua du Bertso Errondak, eta, hala ere, gutxi du lehiatik, gutxiago arautik eta asko umoretik, jolasetik eta lagunartetik.
Denetik du bertsoaldi honek: existitzen ez den hitzen bat, nahieran erabilitako neurriak eta euskararekin batera beste hizkuntza batzuk ere bai; eta, denaren gainetik, umorea. Hori ere badelako errealitate bat: bertsoa nahasian, arautik kanpo eta jolaserako sortzen duena.
Osorik entzuteko modukoa da agurra. Hemen lagin adierazgarri bat:
(…)
Bat, bi, hiru hirukotea
Albeko inseparableak
Bat pasatzen bada, denak finalera
Bat ez bada pasatzen, pandemia bat sortu eta mundu guztia kalera
Bat, bi, hiru hirukotea
Albeko inseparableak
Denek lehen egin zuten
eta tokaiook bigarren (bis)
Karteleko gure izenak
Sailkatze ordenean daude
Tú no lo sabes, tú no lo sabes
Finalean sartzen azkena Ander Anakabe.
(…)
Soy Alcedo y me lo creo
Portuko tipo kaniena eta noski perbertsoena
Soy Alcedo y me lo creo
Belarrian hiru harito, puto amo de la Herriko
Soy Alcedo y me lo creo
Gustatzen zaio batxata
El puto amo de la barraca
Soy Alcedo y me lo creo.
(…)
