Ortzi Idoate: “Xilaba ongi antolatzeko denbora hartuko dugu”
Ortzi Idoate: “Xilaba ongi antolatzeko denbora hartuko dugu”-
Kazeta. eus webgunean atera artikulua, Mikel Irastorza Artolak idatzia.
Konfinamendua dela eta, Bertsularien Lagunak elkarteak Xiberoa, Baxe Nafarroa eta Lapurdiko bertsulari txapelketa eten behar izan du. Ortzi Idoate sustapen arduradunak bertsularitzak berriz plaza hartuko duela segurtatu dio KAZETA.EUS atariari.
“Ez dakigu noiz izanen den buelta. Epe muga jakingo bagenu data berriak finkatuko genituzke, baina hori jakin gabe ezin da aurreikusi”. Hala adierazi du 2020ko Xilabaren ardura duen Ortzi Idoatek Bertsularien Lagunak elkarteak txapelketa bertan behera uztea deliberatu ondotik.
Izan ere, frantziar Gobernuak urriaren 30etik landa konfinamendua ezarri du eta horrek ezinezko egiten du bertsulari txapelketarekin jarraitzea. Xilaba noiz itzuliko den galdeturik, Idoatek “pazientziarekin” jokatuko dutela erran dio KAZETA.EUS atariari. “Ongi antolatzeko denbora hartuko dugu”.
Hala ere, txapelketa tresna bat dela nabarmendu nahi izan du elkarteko sustapen arduradunak. “Publiko aldetik emaitza gehien ematen du, baina bertsularitza hori baino askoz gehiago da”. Ildo horretan, Bertsularien Lagunak elkarteak bertsularitza sustatzeko eta plazara berriz jauzi egiteko bere esku dena eginen duela iragarri du, “baldintzek ahalbidetzen duten heinean”.
Txapelketaren bilan baikorra
Xilaba eten beharrak sortzen duen “penaz” harago, antolatzaileak harro dira irailean abian jartzeko erabakia hartu izanagatik. “Aurtengo txapelketa oso ongi joan da, bai publiko aldetik, antolakuntzatik, lagunduak izan gara, bertsulari asko etorri dira, sorpresak ere izan dira horretan maila polita erakutsiz… Orain arteko txapelketarik onena izateko osagarri guziak genituen, positiboki hartu behar da”, erran du Idoatek.
Elkartearen ustez bi hilabete hauetan bertsularitza eta oro har kultura posible eta segurua zirela frogatu ahal izan da. Entzuleak hautu hori egin izana eskertu duela uste dute eta eskerrak ere eman dituzte gelak utzi dituzten herriko etxeei, laguntzaileei, bertsuzaleei, gai emaileei eta epaileei.
Xiberoa, Baxe Nafarroa eta Lapurdiko bertsulari txapelketa irailaren 19an hasi zen Hiriburun, eta beste hiru kanporaketa iragan ziren Muskildin, Ainhoan eta Larzabalen. Etapa hori gainditurik, final herenetako mementoan zegoen txapelketa. Senpere eta Sohütako saioak iragan baziren ere, Izturitzen urriaren 31n iragarria zena bertan behera gelditu da.
Ortzi Idoate: “Xilaba ongi antolatzeko denbora hartuko dugu”-
