"Katalogotik kanpora": Rosi Lazkanoren bertso sorta
“Katalogotik kanpora”: Rosi Lazkanoren bertso sorta –
Rosi Lazkano Berria egunkarian.
Aian (Gipuzkoa) jaio zen, 1959an. Txikitan bertsotan aritzen zen etxekoekin, baina orduan jolas hutsa iruditzen zitzaion. 50 urte bete zituenean hasi zen bertso eskolan, Orion (Gipuzkoa). Duela 11 urte izan zen hori, eta, ordutik, maiz kantatzen du jendaurrean, puntako bertsolariekin.
1
Katalogotik kanpora dago
Jazte nuen tubo-gona
Batzuentzako ama nauzue
Besteentzako amona
nere burua kontenplatzen naiz
denbora gutxi egona
Ezpain ximurra dut batzuetan
Bestetan aurpegi ona
2
Arto-jorrara joaten nintzan
Joaten esne partitzera
Etxeratzean marmitak hartu
Errekara garbitzera
surtako hauts da espartzuakin
Brillo ederra atera
Izerdiari esker dadukat
Baserritarran karrera
3
Gaztea ere izan nintzan ni
Alaia eta arina
Erromeriazalea eta
Dantza dexente egina
guraso eta elizatikan
Beti aholku jakina
Bekatu harek beldurtze zuen
Gaurko birusak adina
4
Sanpedroetan ezkondu nintzan
Hori nola ez gogora
Maleta egin eta joan nintzan
Eztei-bidaian Bilbora
Orain bezala ez zan orduan
Distantzia eta denbora
Haundia izan zan nengoelako
Atera gabe inora
5
Maiorazkoa maite nuen nik
Baina baserrian gero
Bere guraso, bere amona
Eta osaba soltero
Andre gaztean martxa nola zen
Erakusten egunero
Martxa neukanez dantzatu nuen
Pasodobleakin edo
6
Sua piztuta hartze ninduan
Egunsentiko argiak
Kafe eltzea, baba eltzea
Eta euren ipurdiak
Txapa gainean astinduz gantxo,
paela, burruntzaldiak
Suaren proba gainditu genun
Eltze zein jabeak biak
Doinua: Andre txarraren bentajak
