28 bertsolarik esku hartuko dute aurtengo Xilaba Bertsolari Txapelketan
28 bertsolarik esku hartuko dute aurtengo Xilaba Bertsolari Txapelketan –
Jaialdiak Iparraldeko hiru lurralde historikoetako bertsolari eta zaleak uztartzen ditu
28 bertsolarik esku hartuko dute aurtengo Xilaba Bertsolari Txapelketa Nagusian. Aurtengo udazkenean ospatuko da Ipar Euskal Herrian, irailaren 19an hasiko da Hiriburun, eta finala azaroaren 21ean ospatuko da Donibane Lohitzuneko Jai Alai pilotalekuan.
Jaialdiak Iparraldeko hiru lurralde historikoetako bertsolari eta zaleak uztartzen ditu, hala nola, Zuberoako, Nafarroa Behereako eta Lapurdiko zale eta bertsolariak. Orotara hamar saiok osatuko dute seigarren edizioaren egitaraua. Aipatu bezala 28 bertsolarik parte-hartuko dute, eta, beraz, egun arte inoiz izan den esku hartzerik handiena izango da.
Pasa den urtean taldeka lehiatu zuten Xilaba txapelketa, eta, ondorioz, aurtengo udazkenean banakako txapelketaren alde egingo dute apustu. Bakarkako azken Xilaba txapelketa duela lau urte ospatu zuten eta 2016an Sustrai Colina bertsolari lapurtarra izan zen garailea.
Iparraldeko bertsolariek Nafarroan lehiatzen zuten
Xilaba Bertsolari Txapelketa Ipar Euskal Herriko Bertsolari Txapelketa nagusia da. 2008. urtean jokatu zen lehengengoa eta aurretiaz Iparraldeko bertsolariek Nafarroako Bertsolari Txapelketan parte hartzen zuten, bertan ez baitzegoen edonolako lehiaketarik.
Egitasmoa Iparraldeko Bertsularien Lagunak elkarteak sortu zuen. Lehendabiziko edizioaren finala Donibane Lohitzunen eraman zen aurrera 2008an eta Amets Arzallus gailendu zen bertan. Urte hartan Iparraldeko Bertsolari Txapelketa izena jaso zuen eta 2010. urtean Xilaba Bertsulari Txapelketa izena eman zioten. Xiberua, Lapurdi eta Baxenafarra izenen uztarketa osatzen du izenak.
