Agur bertsoak Daneli
Agur bertsoak Daneli –
Bertsoak: Jon Iñaki, Jon, Ainhoa, Agurtzane, Amaia, Saioa eta Arantzazu
Urtarrilaren 18an azken agurra eman zitzaion Danel Goikoleari Arrasateko Aldai parkean. Almen bertso eskolako lagunak oholtzara igo eta bertaratutakoek honako bertsoak abestu zituzten.
Doinua: Zeru altuan zegoen Jaunak
Bertsoa, kantu, errima edo
eskulanen estetika,
bihurrikeri maitagarriaz
satira eta kritika.
Burua martxan, bihotza libre;
beti zerbaiten irrika,
orain be lagun joan ote haiz
hire ametsei segika!
Gazte hasita euskalgintzako
arima eta haragi
beti ideia berritzaileen
artisau ta margolari
umore oneko taldekidea
beldur barik aldapari
guk ere saltsan segiko dugu
auzolanean kantari.
Zela esan agur bizi guztiko
adiskide maite bati?
Samina eta ulertuezina,
barru-barruan bi zati.
Hauen lekuan, Danel, seguru
kantuz umoretsu beti
mahai baten bueltan hirekin dittuk
Felix, Aitor eta Xanti.
Nola liteke hainbeste gogo
ustekabean eraman?
Dena umore, proiektu, asmo
bizipoz eta harreman.
Hegan egina haiz lehen ere
jarrai ezak orain hegan.
Hire berezko bizi-indarra
gelditu dadila gugan.
Hil bezperen Danelek berak sortutako bertso sorta bat zabaldu zien ingurukoei, whatsappeko audio bidez. Bertso hori agur ekitaldian entzun ahal izan zen; hemen, transkribatuta:
Doinua: Yolanda (Pablo Milanes)
HOLANDA
Ingles klasean galdez andereño Miren
Tulipanak non hazten ote diren.
Estututa, arbelean nago urduri
Txibato batek laguntzeko gertu dirudi
Holanda,
Holanda,
holan da baina, zelan da?
Ingeles asko ere ez dau Arrasaten
“no espik inglix” hala be badakigu esaten
Ikasteko, lana bilatzea zen aitzaki
Ta gero edonork zu baino hobeto daki
Rumano,
Rumano,
Ikasi banu Rumano
Hizkuntza arrotzek a ze logurea
Pentsatu nuen, ikasi nahi dut gurea!
Nahiz kalean askorikan ez erabili,
Heurea duk ta, heurean ondo habil hi…
Ganorez,
Ganorez,
Egin dezagun ganorez
Azkenerako ez bata ta ez beste
Mintzapraktika erraza denik ez uste
Beste bat darabilt, sarriago ta igual hobe
Ikasi nahi nuen bape gogorik jarri gabe
Holan da,
Holan da,
Tristea baina holan da
Holan da
Tulipanena Holanda
Bene-benetan, holan da
