Saats Karasatorrek jantzi zuen VIII. Izeta Sariketako txapela

Bertsolari Aldizkaria 2018-11-27

Saats Karasatorrek jantzi zuen VIII. Izeta Sariketako txapela –

Aurreko ostiralean jokatu zen finala, Elizondoko kultur etxean. Nafarroako Bertsozale Elkarteak jakitera eman duenez, Etxarri Aranazko bertsolariak bildu zuen puntu gehien (246). Haren atzetik sailkatu ziren Josu Sanjurjo (242,5), Mikel Lasarte (242), Sarai Robles (231,5), Irati Majuelo (214,5) eta Amaia Elizagoien (211). Lasarterentzat izan zen bertso onenaren saria, koplen ariketan utzitako lehen bi aleengatik.

Lehen aldiz bertso onenaren saria eman zitzaion puntu gehien eskuratutako aleari: Lasarterentzat izan zen saria, koplen ariketako lehen bi koplengatik. Joseba Beltza, Estitxu Arozena eta Julen Zelaieta aritu ziren epaile lanetan. Gai-jartzaile lanak, aldiz, Maialen Belarrak bete zituen.

Finalean, ondorengo lanak bete behar izan zituzten sei bertsolariek: zortziko handian hiruna bertso, zortziko txikian hiruna bertso, bina punturi erantzun, hiruna kopla, eta bakarka, gaia emanda, bina bertso. Behin lan guztiak amaitutakoan jakinarazi zuen epaimahaiak bere erabakia. Ines Izeta, Mariano Izeta zenaren alabak, jantzi zion txapela Karasatorreri, Elizondon bildutako 80 entzuleen txalo artean.

Hala, Izeta sariketako txapeldunen zerrendara gehitu da Saats Karasatorreren izena, beste hauekin batera: Jon Barberena (2004), Oier Lakuntza (2006), Jon Elizetxe (2008), Iñaki Aleman (2010), Aimar Karrika (2012), Saioa Alkaiza (2014) eta Joanes Illarregi (2016).

Mariano Izeta gogoan

Nafarroako Bertsozale Elkartea eta Baztango Udala dira Mariano Izeta Sariketaren antolatzaileak, baita Baztango Bertso Eskola ere. Elkartearen hitzetan, “Mariano Izetak (Elizondo, 1915-2001) herri kultura eta bereziki bertsolaritzaren alde egindako lan handia eskertzeko helburua du bere izena daraman sariketak. Lanbidez erloju-konpontzailea zen Izeta, baina horretaz aparte lan itzela egin zuen herri kultura eta ondarea biltzen eta ezagutarazten. Egindako guztiagatik, Baztango seme kuttuna izendatu zuten. Idazle, “Nafar Izkuntza”-ko kolaboratzaile, Euskaltzaindiko kide, Baztango hiztegien egile, mutil-dantzen sustatzaile… hamaika kontutan ibili zen Izeta. Bertsolaritza izan zen bere zaletasunik handienetakoa. 1936. urtean egin zen lehen Nafarroako Bertsolari Txapelketan lagundu eta hortik aurrera hamaika bertso saio antolatu zituen. Nafarroako Bertsozale Elkarteko ohorezko presidentea zen.

Izeta Sariketak, garai batean jokatzen zen Xalto Sariketa edo iaz abiatutako Bertsokabi Sariketa bezalaxe, Nafarroako bertsolari gazte eta hasiberriei bultzada ematea du xede, plazak eskainiz, haien bertsogintza garatu eta ezagutzera eman dezaten”.