Bertso Udalekuetako kronikak: Larraul, Bidarrai eta Zuhatza

Amaitu dira Bertso Udalekuak, eta plaza bakoitzean bizi izandakoen idatzizko kronikak eta ikus-entzunezkoak zabaldu ditu Bertsozale Elkarteak. Hemen dauzkazu hirurak bilduta.

Bertsolari Aldizkaria 2024-08-01

Bertso Udalekuetako kronikak –

Larraulgo hegaldia arrakastatsua izan da

Bertso Udalekuen lehen txandak astebeteko egonaldia egin du Larraulen. Baina ez dira egonean egon; munduko txoko desberdinetara bidaiatu baitute.

Uztailaren 8tik 14ra, Larraulgo aterpetxea AIREPORTU bihurtu dute 12-13 urteko 47 lagunek eta 10 hezitzaile-azafatok: egunero bidaiatu dute munduko (zein estratosferako) herrialde ezberdin batera. Lehen egunean begiraleek segurtasun kontroletik pasa zituzten 47 maletak, mugikorrak (eta edozein objektu ausazko) errekisatuz. Zazpi eguneko bidaian, turbulentziazko egitaraua izan dute: “antzerki zuzendaria”, “eguna eta gaua”, “sardinak latan”, “among us”, “kluedo”, “afari mexikarra”, “sormen tailerra”, “mikro irekia”, Zizurkilera txangoa eta bertso poteoa, Asteasuko igerilekuan dzanga…

Hegazkinez Estatu Batuetan izan zirenean, taldea bitan zatitu zen: Pop Star-ak eta Cowboy-ak, nor baino nor aritu ziren lehian. Neurriko bertsolariak etorri ziren, elkarrizketan aritu eta bertso afaritara: Eli Pagola cowboya eta Maddi Agirre pop-starra. Udalekuko lagunek froga xelebreak jartzeaz gainera, bat-batean ere bertso ederrak bota zituzten!

Hegazkina pilotatzen izan dira Beñat Astiz, Eztizen Alvarez, Izaro Bilbao, Uxue Perez, Beñat Zeberio, Ibai Lekuona, June Aiestaran, Haizea Arana, Joane Aldalur eta Maider Altuna hezitzaileak.

Hemen duzue Larraulgo Bertso Udalekuen laburpen bideoa:

Bidarraiko pistatxitoak etxean dira

Aspertzeko tarterik ez dute izan Bertso Udalekutako gazteek Bidarrain egin duten 10 eguneko egonaldian.

Uztailaren 15etik 24ra Bidarraiko Menditarrena aterpean (Behe Nafarroan) izan dira 16-18 urteko 31 begiratu eta 8 begirale-sukaldari. Bidarraien euliak eta turistak adina momentu eder bizi izan dituzte: Bizkarsoro filma ikusi eta Josu Martinez zuzendariaz elkarrizketan aritu dira. Bizitza hari batetik zintzilik jarri dute rafftingean baltsa irauli zenean, zuhaitz gaineko ibilbidean zein Haritzen patinetean, baina beldurrik gehien Beldur Gauean pasa dute… herritarrek. Irulegi irratiaz izan dira elkarrizketan. Pilota Bako Pala Txapelketan olinpiko izan dira (bai, egin liteke, pilota imaginarioaz). Jakin-ek sortutako Geruzak proiektuko bideoak ikusi eta hamaika gairen inguruan filosofatu dute. Bertso-eskola tailerrean errimei armiarma sareak astinduta, Onintza Enbeita eta Miren Artetxe bertsolariekin saioa eginak dira. Sormen tailerrean orotariko artista izan dira, kantuak sortu dituzte inteligentzia artifizialaz zein naturalaz, argazki tailerrak enfokatzen lagundu die, gauez kontzertuak eskaini dituzte taldean batu den musikari kondentsazioaz, eta mikro irekiak dena jaso du bihotzean.

Gazteekin zoroago eta gazteago izan dira Asier Alcedo, Iholdi Beristain, Aner Euzkitze, Oihana Arana eta Eli Zaldua begiraleak. Eta hiru sukaldari-musikari-artista arduratu dira gazteak eta auzoko txerria gizentzeaz: Eneko Alda, Haritz Cervera eta Josu Rodriguez.

Bertan egoterik izan ez dugunok inbidia gehiago pasa dezagun, hemen ikusgai txandako bideoa!

Zuhatzako irlan ‘Guantanameran’

Bost eguneko egonaldia egin dute 9-11 urte bitarteko gazteek ur ekintzak eta lehorrekoak tartekatuz.

Uztailaren 24etik 28ra Zuhatzako paradisuan elkartu dira 9-11 urteko 34 pirata eta 6 hezitzaile kortsario. Lapurdi, Nafarroa, Araba, Bizkaia eta Gipuzkoako bertsozaleek hartu dute irla, Guantanamera doinuan sortutako ereserkiarekin. Egunero ur ekintzak egin dituzte, hatzamarrak zimurtzeraino: windsurf, piragua, arrauna, bela… Eta uretatik lehorrera irtendakoan, energia apurrak xahutu dituzte jolasetan. Irlan naufrago izan dira bi bertsolari gonbidatu: Xabat Illarregi eta Maddi Agirre. Bertsozaleen ongietorria jasota, objektuak emanda pasadizoak inprobisatzen jolastu zuten eta afalostean saio irrigarria eskaini ere bai; Zuhatzako lagunak ere aritu ziren bertsolariekin puntutan. Azken gaubelan mikro irekian lagun bakoitzak bere barneko artista atera zuen, taldea agurtzeko.

Zuhatza maitasunez, dantzaz eta umorez Karibeko irla bilakatu duen begirale taldean Irati Tolosa, Joar Garate, Danel Herrarte, Gari Arexolaleiba, Joane Bilbao eta Maindi Estiballes elkartu dira.

Hitzez ezin dena iruditan ikusteko, hemen txandako bideoa!

Bertso Udalekuetako kronikak Bertso Udalekuetako kronikak