Apirilaren 25ean hasiko da Gipuzkoako Bertsolari Txapelketako sailkapen fasea

20 saio antolatu dira, bi itzulitan. 74 bertsolari izango dira kantari, eta horietatik 48 sailkatuko dira bigarren itzulirako; 34 bertsolarik eskuratuko dute udazkenerako pasea.

Bertsolari Aldizkaria 2024-04-10

Gipuzkoako Bertsolari Txapelketako sailkapen fasea –

Gipuzkoa Bertsotanen aurtengo edizioa apirilaren 25ean hasi eta ekainaren 2a amaituko da. Saio guztietarako sarrerak salgai daude jada bertsosarrerak.eus atarian.

Aurtengo edizioak berezitasun ugari dakartza. Batetik, iraupena: hilabete eta erdi pasatxo iraungo du. Saioak bikoitzak izango dira, lehen itzuliko lehena eta azkena izan ezik. Lehen itzulian 12 saio izango dira, ostegun eta ostiraletan; bigarrenean, aldiz, 8, larunbat eta igandeetan. Txapelketaren forma bera ere aldatu da: ariketetan berrikuntzak daude, eta horien lanketaren atzean egon da Bertsogintza Batzordea, Talde Antolatzailearen baitan. Bertsolariek egin beharko dituzten ariketak ikusteko egin klik estekan.

“Txapelketako sailkapen fase hau gauzatu dadin ezinbestekoa da lehengaia egotea: bertsolariak, antolatzaileak, gai-jartzaileak, epaileak eta, oro har, bertsozaleak. Bertsolaritzaren ekosistema honetan lehengai hori sortzen dutenen lana eskertu eta lan horren aitortza egin nahi diegu bertso-eskolei: jakitun baikara beraiek direla aipatutako ekosistema horren eusle”, adierazi dute Gipuzkoako Bertsozale Elkartetik. Aurtengo irudia eta mezua ildo horretatik diseinatu dituzte. Unai Gaztelumendiren irudiak bertso-eskoletako lehen belaunaldi inguruko irudiak dakartza, behean Uztapide duela. Zuri-beltzeko argazki horretatik gaur eguneko bertso unibertsora heltzeko ezinbesteko pausoa izan dira bertso-eskolak, eta horixe irudikatu nahi du, hain zuzen ere, Gaztelumendiren irudiak.

Beste berritasunetako bat da saio bakoitzaren ondoren afari-merienda antolatuko dutela tokian tokiko bertso-eskolek. Keinu hori “aurtengo txapelketaren mezuarekin bat dator, bertso-eskolak erdigunean jartzen baitu, eta bertsoaren unibertsoa zabaltzen baitu”.