Karta jokoa –
- Aries
Udaberriko aurkezpenetatik hasi, prentsa jarraipena, eta gabonetako argiak piztu artekoa luze egin zaizu. Ez zara uneoro murgilduta egon, baina aldizka asko eskaini diozu. Tentsioak edo belarri atzean eulia izateak nekatu egiten du. Lau urtean behin izaten da eta eskerrak. Orain probestu atseden hartzeko.
- Taurus
Hasierak oro bukaera zor du. Akaso ez zenuen iritsi zedin nahi eta orain, neurri batean amaitu izanaren pena duzu. Saioa hasi aurreko arnas estuan, saltsa honetan sartu izanaz damutu zara. Aitzitik, sintoniarik gabeko arratsaldeek emozio hutsunezko biharamunak ekartzen dizkizute.
- Gemini
Serio hartu duzu prestakuntza lana, opa zenion zeure buruari horrenbeste. Asko zentratu zara txapelketan, agian gehitxo. Zure bueltako kideak ere zurrunbiloan sartu dira, eta zenbait alditan kanpo ikuspegi orokorrago batek mesede egingo zizuketen. Emaitza alde batera utzita, egindako bideaz gozatu izanaren irudipena daukazu.
- Cancer
Ia ahaztuta zeunden aurtengoa txapelketa urtea zenik, baina behin Google Forms-a bete eta prozesuan barneratuta, uste baino erosoago joan da. Besteak entzunaz asko gozatu duzu, ispiluak ikusten dituzu nonahi, ikasten eta hobetzen jarraitzeko. Orain kasik gogoz zaude lau urte barru iritsi daitekeenerako.
- Leo
Zuretzat jendearen txapelketa izan da. Prestakuntza aldian, saio aurretik eta ondoren, gertukoak hor dituzula sentitu duzu. Espero ez zenituenak ere agertu dira besteek utzitako hutsunea betetzera. Lanpetuta ibili zara, zalantza eragiteraino aldamenekoengandik jasotako babesa behar beste eskertu eta bueltan eskaini ote diezun.
- Virgo
Epaiari buelta asko eman dizkiozu. Jakitun zara lehendabizi sinatzen den dokumentua dela hitzarmenarekiko adostasuna, badakizu zein diren baldintzak. Hala ere gai jartzaileak puntuak esaten dituen bakoitzean, zerbait oso intimoa ezbaian jarriko balizute bezala da.
- Libra
Prozesu honetan asko ikasi duzu. Agian, bertsoen teknikan ere izan duzu hobekuntza, baina hortik kanpo, ideietan, diskurtsoan, argudiaketan…arlo pertsonalerako baliagarri zaizkizun konpetentzietan trebatzeko balio izan dizu. Horrek poz ematen dizu, saioaren ondorio objektiboari itzal egiten dion poza.
- Scorpius
Une batzuetan eskertuko zenukeen haizea aldeago tokatu izan balitzaizu, erosoago egingo zenukeen bidea. Gaiak orekatuagoak izan zitezkeen, aretoa beroagoa eta kantukideak beste batzuk. Balio beza gogoratzeko, jakin behar dela zortea lagun ez denean ere aurrera egiten.
- Sagittarius
Badakizu bertso epaituarena tramite efimeroa dela. Urtean zehar hitzarekin duzun harremanari jaten ematen diotenak ez dira 3 ofizio eta 2 bakarkako; asteroko dinamikak, saio informalak, ateraldi umoretsuak… horiek erakarri zintuzten mundutxo honetara, eta horiei esker eusten zaio txapelketen arteko aldian suari bizirik.
- Capricornus
Hobeto irten zitekeen, baina baita askoz okerrago ere; zeuretik aritu zara behintzat. Luze edo motz iruditu daiteke nondik begiratzen den. Argi dagoena da ahal beste saiatu zarela. Izango dituzu aukera gehiago benetan balio duzuna erakusteko.
- Aquarius
Inprobisazio literarioak oso pisu erlatiboa du zure eguneroko bizitzan. Normalean ez zenuke lehentasunezko zerbait bezala hartuko, baina diziplina honekin lotutako uneak hain dira intentsitate altukoak, ezinbesteko bihurtzen direla. Gero astelehenean berriro sartzen zara errutinaren gurpilean, oinak eta doinuak ahazten zaizkizu; agian ez da horrenbesterako.
- Pisces
Une batez astroen lerrokatzean sinetsi zenuen. Txapelketa meritokrata izan zitekeela, justua, eta eman zeniona bueltan ekarriko zizula. Ordea, oholtzako eserlekuen zenbakiak zozketaz erabakitzen dira, eta idazkariaren aktakoak zoriz. Bihotzekoaren karta eta umeen partxiseko dadoak Barbieren txapelpeko izerdian hasten dira.
