Bertso-kopla bideo lehiaketaran V.edizioa abiatu da

Arabako Bertsozale Elkarteak eta Arabako ALEAk antolatu dute elkarrekin Araba osoko 14 urte arteko gazteei zuzendutako bideo-kopla lehiaketa. Parte hartzeko epea azaroaren 15era arte dago zabalik.

Bertsolari Aldizkaria 2024-10-23

Bertso-kopla bideo lehiaketaran V edizioa abiatu da –

Gasteizko Udalak antolatzen duen Euskararen Astearen egitarauan txertatu dute ekimenak, “gure lurraldean euskararen erabilera sustatzeko helburuarekin eta aurreko urteetan izandako arrakastak hauspotuta” adierazi dute antolatzaileek.

Modu honetan, bertsolaritza eta teknologia berriak uztartuta, taldeka, Arabako bertsolari gazteek beraien adimena eta sormena erakusteko aukera izango dute, bideo lehiaketa formatuan.

Parte hartzea oso erraza da, hiru eta sei kopla artean osatu beharko ditu talde bakoitzak proposatutako gaia landuta. Hauxe gaia:

Zer dago ikusteko zure inguruan?

Bete parte-hartze galdetegia

OHAR GARRANTZITSUAK

Bideoak galdetegiaren bitartez bakarrik bidali ahalko dira. Ez dira onartuko emailez, whatsapp bidez edo beste edozein bidetatik jasotako bideoak.

Epe barruan jasotako bideoak bakarrik onartuko dira. Bidalketa epea azaroaren 15eko 21:00etan bukatuko da.

Bideoak bidaltzeko arazorik izatekotan, bide hauetatik argitu ahalko dira zalantzak:
- 695 63 28 62 telefono zenbakira deituta, astelehenetik ostiralera 10:00etatik 14:00etara.
- bideokopla@gmail.com helbidera idatzita (erantzuna mezua jasotzen denetik hurrengo 24 orduetan emango da).

Irabazleak eta sariak

Jasotzen diren lanen artean, bideo-kopla onenaren saria aukeratuko du publikoak, eta, horrekin batera, ALEAko eta Arabako Bertsozale Elkarteko epaimahaiek lan bana aukeratuko dute; baliteke ere epaimahaiak aipamen bereziak ematea talde gehiagori.

Ugari izango dira sarituak horrenbestez, eta askotariko sariak izango dituzte eskuragarri:

Laboral Kutxaren eskutik, taldean gozatzeko Eskape Room bat Lautadan.
BAHK-eko izotz pistan taldean gozatzeko esperientzia..
HONTZA EXTREM abentura parkean taldean gozatzeko esperientzia.
ELKAR-en material sortak irabazleentzat eta taldearentzat.

Sari banaketa

Sari banaketa abenduaren 1ean 12:00etan egingo da, oraindik zehazteke dagoen Gasteizko areto batean. Ekitaldian, irabazleen bertsoak ikusi eta sariak banatzeaz gain, saio musikatuaz gozatu ahalko da lurraldeko bertsolari onenen eskutik.

Ekitaldian parte hartzeko gonbidapenak edo sarrerak aldez aurretik erreserbatu ahal izango dira.