"Nondik eta zeri ari gatzaizkio bertsotan", Udako Ikastaroetan

Uztailaren 4an eta 5ean izango da ikastaroa, Donostiako Miramar Jauregian. Matrikulatzeko epea zabalik dago, eta maiatzaren 31ra bitarte merkeagoa izango dela ohartarazi du Bertsozale Elkarteak.

Bertsolari Aldizkaria 2024-04-30

Udako Ikastaroetan –

Argiak dira Udako Ikastaroaren xedeak, aurtengo gaia hizpide: lehenik eta behin, bat-bateko bertsogintza garaikidearen sorkuntza mailako kezkei buruz hausnartzeko eta gogoetak partekatzeko gune izango da; jarraitzeko, botere harremanak bertsolaritzan eta gai libreko bertsogintzaren gakoak azalduko dira; amaitzeko, edukizko lanketari buruzko hainbat argibide plazaratuko dira.

Uztailaren 4ean hainbat hitzaldi eta mahainguru bat eskainiko dira. Saioa Alkaiza izango da lehenengo eguneko aurreneko hizlaria, Diskurtso guztiak errespetagarriak dira? hitzaldiarekin. Segidan gaiak kantatzerakoan dugun zilegitasunari buruz ariko da Maider Arregi, eta botere harremanei buruz jarraituko du Onintza Enbeitak. Oihana Arana izango da eguneko azken hizlaria, eta bertsolaritza ideologikoki lerraturik ote dagoen hausnarketa ekarriko du mahai gainera. Eguna biribiltzeko, lau hizlariek mahai-ingurua osatuko dute, egungo bertsogintzako diskurtso, zilegitasun eta itzalei buruz.

Bigarren egunean Jexux Mari Irazu izango da lehenengo hizlaria eta libreko bertsogintzari buruz ariko da. Alaia Martin eta Imanol Artola izango dira hurrengoak, eta gai-jartzaile autoreari buruzko iritzia plazaratuko dute. Aitor Bizkarrak eta Oihana Iguaranek hitzaldi bana eskainiko dute egoera sozio-ekonomikoari kantatzen ote zaion hausnartuz. Azkenik, Oihane Pereak eta Beñat Gaztelumendik Formatik haragoko lanketa bertso eskoletan; gaien eta ideologiaren lanketa hitzaldiak onduko dituzte, bakoitzak bere talaiatik.

Elkartetik adierazi dute bertsolarientzat zein bertsozaleentzat interesekoak izango diren edukiak landuko direla, baina ez hori bakarrik, “bertsolaritzatik haragoko beste kultur esparruetako eragile zein sortzaileentzat ere zalantza, bidegurutze zein kezkez aritzeko aukerako plaza izango da ikastaroa”.

Matrikulatzeko epea zabalik da, eta www.uik.eus atariaren bidez egin daiteke. Hurrengoak dira prezioak: orokorra, 84 euro; erretretadunak, langabeak, ikertzaileak… 71 euro; 25 urte arteko gazteak, maiatzaren 31 baino lehen matrikulatuz gero, 25 euro (bestela, 59 euro). Prezioei buruzko informazio osoa hemen topatuko duzue.

Egitarau osoa hemen aurki dezakezue eta matrikula www.uik.eus atariaren bidez egin daiteke.