Aulki-jokoa –
Doinua: Saltarina da txepetxa eta
Iragan udal-hauteskundeetan
zausk egin zuen bihotzak,
konturatzean ezkerraldera
aldatu zirela bozak.
Ziklo-aldaketaz mintzo zirenak…
Garaipen historikotzat
jo zuten horien analisiak
ez al ziren hankamotzak?
Gutxi iraun zuen pozak.
Gasteiz, Kuartango zein Zigoitia,
Oion nahiz Durangokoa
alderdientzat udal-trukea
noiz izan da oztopoa?
Gehiengoaren erabakia
ez denean gustokoa
demokraziak badu truko bat
(eta gero gerokoa):
has bedi aulki-jokoa!
Astelehenean besaulkigintza
lanari zitzaion ekin,
Ituna deitzen dioten hori
hain da banaketa gordin:
Zuk Gipuzkoa, niretzat Gasteiz…
Iruñea berdin-berdin,
sinestezina da zenbat hari
mugitu behar den arin,
ezer aldatu ez dadin.
Zein dira aulki-jokotik kanpo
utzi dituzten bakarrak?
Toki askotan gailendu diren
Iriarte eta abarrak.
Arauak jartzen dituenetik
jainkoak ta lege zarrak
herri honetan gorri-gorriak
dira alfonbrak ta marrak;
baina ezberdin xamarrak.
Aulki-goseak irudimena
eramaten du noranahi:
gaur jolaskide izan litezke
kanpainan zirenak etsai.
Jeltzale eta sozialistentzat
maldak direnetik zelai
noski direla eskuinaldean
lagunak aurkitzeko gai…
ta eskuinerago ere bai!
Egun gutxira ikusten bada
benetako aurpegia,
gezurra zela agindu eta
esandakoen erdia…
Zergatik ez da aurrez azaltzen
itunen ikuspegia?
Zer da ba zure hautesleari
argi esatea egia?
Demokratikoegia?
Akordeoiak jotzen uztean
nor izango da aurrena?
Aulkira ipur-masailak josten
hautagairik azkarrena?
Lasai, joko hau luzatuko da
ekain osoan barrena
ta hauteskunde orokorretan
ikusiko da hurrena
zein aulkik duen herrena.
